cilantro rice recipe cooking tips vegetarians special food item

కొత్తిమీర అన్నం.. వెజ్ బిర్యానీలాంటి ఆహారం. ఇది ఎంతో రుచికరంగా వుండటంతోబాటు ఆరోగ్యానికి ఎంతో మంచిది. బియ్యంతోపాటు కొత్తిమీరి, టమోటాలు, ఇతర పదార్థాలతో తయారుచేసే ఈ రిసిపీలో పోషకాలు పుష్కలంగా వుంటాయి. పైగా దీని తయారీ విధానం చాలా సులభం కావడంతో తక్కువ సమయంలోనే ముగించుకోవచ్చు. ముఖ్యంగా వెజిటేరియన్స్ వారికైతే ఈ భోజనం.. ఎంతో శ్రేయస్కరం. మరి.. దీన్నెలా చేస్తారో తెలుసుకుందామా...

Prep Time

20 Minutes
Cooking Time

20 Minutes
Servings

4

కావాల్సిన పదార్ధాలు

రెండు కప్పులు బియ్యం
ఒక పెద్ద కట్ట కొత్తిమీర
4 లేదా 6 పచ్చిమిర్చి
కొద్దిగా అల్లం
ఆరు రెబ్బలు వెల్లుల్లి
2 లేదా 3 టమోటాలు
తగినంత ఉప్పు
2 టీ స్పూన్స్ నెయ్యి
6 లేదా 7 లవంగాలు
2 లేదా 3 యాలక్కాయలు
2 ముక్కలు దాల్చిన చెక్క

తయారు చేయు విధానం

Step 1
ఒక పాత్ర తీసుకుని అందులో కొద్దిగా నెయ్యి వేసి వేడి చేయాలి. నెయ్యి కాగిన తర్వాత అందులో పచ్చిమిర్చి, కొత్తిమీర వేసి ఓ నిముషంపాటు వేయించి, తర్వాత క్రిందకు దించి చల్లార్చుకోవాలి.
Step 2
వేయించిన కొత్తిమీర, పచ్చిమిర్చి, అల్లం, వెల్లుల్లి అన్నింటిని పేస్టులా కలగలుపుకోవాలి. ఒకవేళ ఈ మిశ్రమం గట్టిగా వున్నట్లు అనిపిస్తే.. కొద్దిగా నీళ్లు కలుపుకుని మెత్తగా చేసుకోవాలి.
Step 3
ఇప్పుడు ఓ కడాయి తీసుకుని అందులో నెయ్యి వేసి వేయించాలి. నెయ్యి కాగిన తర్వాత అందులో లవంగాలు, యాలక్కాయలు, దాల్చినచెక్కలు వంటి మసాలా దినుసుల్ని వేసి వేయించాలి. అవి వేగిన తర్వాత కొత్తిమీర పేస్టు వేసి.. కలుపుతూ వేయించాలి.
Step 4
అందులోనే టమోటా ముక్కల్ని కలిపి 5 నిముషాలపాటు వేయించి ఉప్పు కలుపుకోవాలి. ఇందులో మూడున్నర కప్పుల నీటిని పోసి బాగా మరిగించాలి. ఇది మరుగుతుండగానే ఇదివరకు నానబెట్టిన బియ్యాన్ని వేసి కలియబెట్టుకోవాలి. అన్నం అయ్యేంతవరకు వుంచి తర్వాత క్రిందకు దించేయాలి. అంతే! కొత్తిమీర అన్నం రెడీ!